Skip to main content

Euver Ós

Bio

La Bamba oet Mofert besteit oet Ron Roemen en Harrold Knoben.
Al 13x inne LVK-finale.
Winnaars LVK 2013.

Video's

Sins de start van La Bamba zeen d’r hieël get video opnames van ós gemaak. Veer höbben ’t grótste deil veur uch op ’n rieke gezatj.

Persfoto's

Òs foto's kintj geer rechtevrie gebroeke. Via de link hieònger alle foto's in groeat formaat downloaden.

Euver Ôs

Who the f... is La Bamba?

Lèt Op: Veur Aankondiging Optraeje, Presentatie Op Websaits, Waekblajer Enz. Kiek Dan Bie persinfo Bie Korte Biografie >  

‘t Oet Mofert aafkomstige La Bamba besteit oet Harrold Knoben en Ron Roemen, vrunj van kleins aaf aan.

Mit väöl power verzorge zie häör optraejes. Sjoenkele, achterein inne polonais, danse, hakke, springe én mitzinge. Det gebeurtj d’r bie de optraejes van La Bamba.

Ze bringe veurnamelek eige leedjes zoeawie ónger angere de vastelaoveskrakers oet 2008 ‘Drök, drök, drök’ en ’Knaokehel op det vel’, womit La Bamba in 2009 ein 2e plaats op ’t LVK behaoldje.




In 2011 waerdje op detzelvendje LVK ein 5e plaats behaoldj mit ‘Vastelaovendj in Limburg’ en in 2012 ein 8e plaats mit “Waat se hie zuus det zuus se nörges”.

In 2013 waerdje de 1e plaats behaoldj en ging de Bertha Paulissen-trofee mit nao Mofert. Mit ’t leedje “Laef, Limburg laef!” won La Bamba mit euvermach ’t Limburgs Vastelaovesleedjes Kónkoer. De kroean op ’t werrek!

In 2014 stóng La Bamba same mit zate hermenie de Roepoepers inne finale mit "Hie in Limburg is 't good". Ein 8e plaats woor 't eindrezeltaat.
In 2016 waerdje mit "Ederein" ein 5e plaats behaoldj.

In 2017 woor 't eindrezeltaat ein 16e plaats mit "Halleluja, alaaf!" en in 2018 mit "Veer moge weer (daag en nach)" ein 12e plaats.
Mit "Ich bön eine vastelaovesgek" haolde veer in 2020 'n 8e plek in de finale.

In totaal stóng La Bamba 13 kieër inne LVK finale.

Naeve dees LVK-knallers en anger eige limburgstalige leedjes bringe de mannen oet Mofert ouch bekindje duitse sjlagers wie Ein Festival der Liebe, Hey wir wollen die Eisbär’n seh’n, Du kannst nicht immer siebzehn sein en Schöne Maid.
Allemaol veurzeen van eine lekkere dreunende Mallorcabeat.

Mer ouch Ik voel me zo verdomd alleen, ein ingelstalige medley van all time-hits en Limburg (’t is een kwestie van geduld) kinne veurbie kómme.

Welke leedjes d’r ouch gezónge waere, de manne dinke mer aan ein dink: Fieëske boewe en dus…… Gaas op dae zuger!

Laifstorrie

Es start van La Bamba haje veer 1 jannewarie 2000 aan.

't Jaor det in eine kieër, gans toevallig, die "Drie witte doeve" veurbie kwame gevlaoge. Doe vónje ouch de ieëste optraejes plaats. Die doerde euveriges mer 15-20 menute, bie gebrek aan repertoire want dit loog neet inne plenning en veer hawwe d'r dus totaal neet op geraekend.

't Jaor d'rnao woor 't ieëste album van La Bamba vaerdig want platemaatsjappie Telstar (ónger aaveuring van Jos Laumen) zoog 't hieëlemaol zitte mit La Bamba. Bie Telstar (en Limbo Music) brachte veer ouch nag versjillende singles oet.

De opnames van versjillende Telstar-leedjes wore bie Pebble Music. Veer wore dao zoea kontent euver det veer oeteindelik de euverstap nao Pebble Music höbbe gemaak en dao 5 gezellige jaore höbbe mitgemaak.

Nao versjillende albums bie Pebble Music höbbe veer noe hieëlemaol oze dreij gevónje bie Marlstone Music wo veer vanaaf november 2007 opnumme. Veer veule ós dao hieëlemaol thoes.

Ron Roemen

Gebaoren (7 december 1968) en getaogen in Mofert.

Gebaoren en getaogen in Mofert. En nao tieën jaor oppe Deelgaard inmiddels al sins december 2011, same mit mien soulmaatje Anju, in Schalbruch (Dld) te vinje.

Miene grótste hobbie is óngetwiefeld zingen oppe buun. ’t Bedinken en sjrieve van nuuj leedjes veur La Bamba vinj ich ouch hieël leuk. Dit doon ich, op spesjaal verzeuk, ouch veur anger artieste.

Ich bön 25 jaor achterein actief gewaes inne tamboerwaereld (1987 - 2012). Met name de fluit- en tamboerkorpse wore miene groeate passie.
Väöle lof der jury's, Limburgse- en Nederlanse kampioensjappe en hoogs aantal puntjes höb ich es dirigent mit mien vereniginge behaoldj in mien karriejaere.

Óngetwiefeldj de sjoonste herrinneringe höb ich ane succesvolle deilnames mit Excelsior Montfort aan het WMC.
Twieë gouje pauke veure hoogste score vanne daag: Marswedstrijd 1993 en marsparade 2001, mit lof der jury.
En 't hoogs aantal puntje bie de fluiterkorpse oppe marswedstrijd op 't WMC van 1997. ’t Woren ech prachtige jaore van hel en gepasjeneerd wèrke en lang, hieël lang naokaarte☺.

Nao vief sebbetikel jäörkes bön ich noe weer actief in dit waereldje. En waal in mien eige dörpke Schalbruch oppe Selfkantj, bie ’t Trommler- und Pfeiferkorps Selfkant-Schalbruch e.V.

Ouch dao wuuerdj, gelökkig, lang naogekaart…..en ’t bleef nag lang ónröstig in Sjaubrook.




Harrold Knoben

Gebaoren op 5 april 1970 in Mofert, zoon van Jac en Toos Knoben-Lowis. Ich höb ein zus Samantha.
Ich höb eine mega knappe, leve sjat van ‘nne zoon Tren. Dae geit inmiddels al nao de groeate sjoeal.
Verder bön ich bonuspap van Gwenny en Dani, reserve sjoeanvader van Ron en opa Harrold van Daley en Danae.
In 2013 neet allein ‘t LVK gewónne, mer ouch same mit miene sjat Nicolle ein huuske gekóch in Mofert.

Sins 1988 wèrrek ich bie Novoferm, es servicemonteur inne boetedeens. Dus moch geer ‘n gael bös taenge kómme…. ff zwejje!

Es 9 jaorige bujel bön ich mien meziekcarrière begós bie ’t Fluit- en tamboerkorps Excelsior in Mofert.
Nao 3 jaor orgelles kós ich op 19 jaorige laeftied ane bak es toetsenis bie dansorkes Sunway
In 1997 is ane tap mit Ron ‘t idee ónstange óm samen ‘n orkes te beginne. ‘t Begin van La Bamba.
De res is uch inmiddels allemaol waal bekindj.

In miene vrieje tied doon ich gaer:
- Trainen en voetbalwedstrijde kieke van Tren
- Kaoken is eine groeate hobby. Allein ‘t eindreseltaat is neet altied desse zaes van uuuh, ich sjöp mich nag eine kieër op. Soms bön ich “de masterchef “ in hoes en soms moog ich frietjes gaon haole ☺
- Nao de hónjsclub óm Nicolle te supportere mit Vjenna ”oze dobermann”
- F1 kieken op alle waereldtieje
- Aaf en toe ‘n pilske pakke bie Ine (Café Boszicht) mien stamkroeg
- Oppe buun staon mit miene bèste vrundj Ron
- Gezellig same zeen mit de familie vinj ich ‘t allersjoonste waat d’r is

Mark Claessen

Effe veursjtelle:

Ich bön Mark Claessen gebaore en getaoge in Zöstere.
sinds 2012 bön ich bie alle optrejes van La Bamba d’r bie es hunne vaste geluidsman.

Ich bön getrouwd, höb twieë kenjer en in ut dagelikse leave bön ich wirkzaam es hoofconcierge op ein praktijksjoal in Heerle.

Ich bön eine vervente formule ein kieker. Auch boew ich gaer radiografisch besjtuurbare auto- en vleegtuigmodelle en vleeg ich mit drones.

Väöl tied veur anger dinge blif der den auch neet euver. Mer veur ens lekker te gaon oet aete maak ich altied tied vrie.

Zao, noe höb ich genog gezeivert.
Weer kömme ós vas en zeker waal urges taege bij ein optreje van La Bamba.

Deil mit in 't La Bamba geveul

Veur spas en plezeer, neet allein mit vastelaovendj mer ouch de res van 't jaor!

Cookies
Voor het optimaal functioneren van deze website worden cookies op uw computer geplaatst. Daarbij worden geen persoonlijke gegevens opgeslagen. Door op ‘Akkoord’ te klikken, accepteert u het plaatsen van cookies. Als u cookies weigert, kunt u de website gewoon blijven gebruiken maar dan werken de website of onderdelen daarvan mogelijk niet optimaal.