Skip to main content

LVK Historie

logo labamba transp800x242

LVK Historie

La Bamba op 't LVK

LVK 2021

Waat löp mós se laote loupe
Halve Finale

Jaomer, helaas, leider, awel das spijtig, it’s a pitty. Gein veertieënde LVK-finale veur ós in ‘t “corona-jaor” 2021 mer…….we’ll be back!

LVK 2020

Ich bön eine Vastelaovesgek
Finale - 8e

Mit oos leedje "Ich bön eine Vastelaovesgek" haolde veer 'n ieërvolle 8e plek in de finale.

LVK 2019

Euver hóngerddoezjendj jaor
Halve Finale

Oos leedje "Euver hóngerddoezjendj jaor" woor helaas neet good genóg veur ein 13e finaleplek. Zoea geit det helaas…..that’s life.

LVK 2018

Veer moge weer (daag en nach)
Finale - 12e

Veer wore hieël blie det veer weer nao de finale moogdje mit “Veer moge weer (daag en nach). Wie dök luues se ’t neet róndj de 11e vanne 11e op Facebook?: Veer moge weer! De echte vastelaovesgekke zeen zoea blie wie ein kindj det se weer moge. Veer ouch trouwes, blie det veer de miense weer moge ammezere. In oos 12e finale behaoldje veer ein 12e plaats, toepasselek.

LVK 2017

Halleluja, alaaf!
Finale - 16e

Halleluja, alaaf! ’t Gospel-vastelaovesleedje. Ein 16e plaats woor ’t eindrezeltaat op ’t LVK van de WinkBülle in Heële.

Veer hawwe d’r zeker mieër van verwach. Mer höbbe toch flink fieës gevierdj bie thoeskóms. Det is trouwes ummer zoea en neet aafhankelek vanne oetslaag mer vanne luuj die d’rbie zeen.

Halleluja, alaaf, alaaf, alaaaaaaaf!

LVK 2016

Ederein (Gaas op dae zuger)
Finale - 5e

2016 is ’t jaor van “Gaas op dae zuger” gewaore. Ein leedje det Ron “gewuuen” haw gesjreve veur oppe buun en neet veur ’t LVK, waerdje oeteindelek ingesjik.

De vastelaovesproklemasie, volges ós en väöl kinners ouch erreg gesjik veur ’t LVK, mós ’t aafligke taenge Ederein (baeter bekindj es Gaas op dae zuger). Veer wolle neet det veer, ’t pebliek enne DJ’s weer tösse twieë leedjes móste keze dus höbbe veer det zellef mer gedaon.

Mit ein 5e plaats belandje veer tómmer weer lekker inne TOP 5. De res van gesjiegte van Ederein is bekindj want ’t leedje duitj neet ónger veur "Laef, Limburg laef!" mèrke veer tiedes oos optraejes.
En daoróm is dit “gewuuen buun-leedje” in ein jäörke tied oetgegreudj toet eine echte La Bamba-kraker.

LVK 2015

Zèk neet det ich neet kin gaon
Halve Finale

't LVK van dit jaor eindigde helaas al inne halve finale. Ein groeate teleurstèlling want veer dachte det veer mit "Zèk neet det ich neet kin gaon" weer eine topper in hoes hawwe.

Mit ein 10e plaats bie 't volk (sms-e) en ein hieël teleurstèllendje 43e plaats bie de hoofjury zoot ein finaleplaats d'r echter (net) neet in. Det duit pien mer det huuertj helaas bie 't mitdoon aan eine wedstried: U can win u can lose.

Veer zeen stols op dit keileuke leedje. Alaaf!

LVK 2014

Hie in Limburg is 't good - Finale 8e plek
same mit De Roepoepers

In 2014 is ‘t LVK door GMV De Plaggenhouwers (GMV) oet Grevors (Grubbevors) georganiseerd en waal op vriedig 14 fibberwarie.

De finale is inne ZON Veilinghallen in Bliërick (Venlo-Blerick) gehaje.

Veer höbbe de Bertha Paulissen Baeker trök gegaeve en mochte, volges tradisie, de LVK-finale äöpene. Nag eine kieër “Laef, Limburg laef!”, es winnaar van ’t LVK van 2013, de hal én Limburg in blaoze.

Mit ein 22e plaats bie de hoofjury hawwe veer eigelek net gein rech op ein finaleplaats (de 19 bèste) mer dankzij oze fanetieke achterban höbbe veer det toch weer gered. Waat hètj gered?!

De meiste bónne van allemaol en ein 8e plaats bie de smsjes zorgde d’rveur det veer oppe 2e plaats eindigde bie de totaalstumme van ’t volk inne halve finales. Daobie de puntje vanne hoofjury getèldj zorgde d’rveur det veer oeteindelek es 4e de finale inginge. En in die finale krege veer van ’t volk via de smsjes ouch weer de meiste stumme.

LVK 2013

Laef, Limburg laef!
Finale - 1e

Nao 11 deilnames, 10 halve finales, 8 groeate finales, en ónger angere ein viefde en ein twieëde plaats wintj La Bamba 't LVK mit "Laef, Limburg laef!"

En bezorg zoea Mofert de allerieëste LVK-wins oeatj.
Veer hove neet oet te ligke wie blie det veer wore. Det haet gans Limburg oppe televies kinne zeen

LVK 2012

Waat se hie zuus det zuus se nörges
Finale - 8e

Hieël toepasselek veur dit LVK in Mergraote woor oze titel "Waat se hie zuus det zuus se nörges": Want ’t geklómmel mit de jes hawwe veer nannörges gezeen en haope veer ouch noeatj nörges mieër te zeen.

Of mót ’t mesjien zeen "Waat se hie huuers det huuer se nörges?" Want ’t boegeroop van ’t pebliek bie de bekindjmaking vanne winnaar haope veer netuurlek ónnoeatj nörges mieër te huuere.

Blief dan ónnag get positiefs van dees finale hange bie ós?
Jaozeker waal. De 3e plaats van ’t volk bie de sms-stumme is veur ós eine flinke steun inne rök det La Bamba gedrage wuuerdj door ’t pebliek en det veer good bezig zeen.

En "Waat se hie zuus det zuus se nörges" waerdje vanaaf de finale (toet aan de finale deej ’t leedje nul komma nul bie ’t pebliek) eine La Bamba-klassieker want gans Limburg blaert óngertösse dit sjovenistiese leedje knaokehel mit.

LVK 2011

Vastelaovendj in Limburg
Finale - 5e

Mit "Vastelaovendj in Limburg" behaolde La Bamba ein ieërvolle 5e plaats op ’t LVK 2011.

Neet gewonne mer toch ein hieël good geveul euver gehaje aan ’t KepèLVK in Panningen.

LVK 2010

Van baove nao ónger
Halve Finale

Oos LVK inzending veur 2010 woor "Van baove nao ónger" ’n Leedje det ’t geweldig duit bie oos optraejes en wobie spontaan toch ouch weer ’n “dansje” bie is onstange.

Helaas neet good genóg veure finale van ’t LVK mer det probere veer ’t volgendj jaor weer döbbel en diek in te haole.

Sloet aan inne allergekste polonais die d’r oeatj is gewaes, en hos same mit Ron vanne Deelgaard nao Mofert en mit Harrold weer trök - grapje - des neet vol te haje...veur ós altans. Veer gaon “gewuuen” mit zien alle: Van baove nao ónger!
Veer winse uch väöl plezeer inne polonais.

LVK 2009

Knaokehel op det vel
Finale - 2e

Veur 't LVK 2009 höbbe veer oos kaarte gezatj op ‘t leedje "Knaokehel op det vel"
Es se gein noeate kins laeze en doe wils toch gaer bie ’n joekskepel of zate hermenie zeen den kins se ’t bèste gaon trómmele (want die spele zónger pertie).

Mesjien get (té) ónieërbiedig gezag ten opzichte vanne trómmelieërs ónger ós, mer ’t is vastelaovendj en den moog se (mós se!!) es leedjessjriever dien fantezie riekelek laote gaon. Geer witj allemaol wie ‘t is aafgeloupe mit dit leedje: VIZEMEISTER!!!!!!!!!

LVK 2008

Drök drök drök
Finale - 7e

't LVK-leedje van 2008 "Drök drök drök" geit euver ‘nne échte karnevallis dae euveral bie wiltj zeen, euveral veuraan wiltj staon, mer netuurlik tied te kort kump. Hae reis die daag gans Limburg door op zeuk nao spas en plezeer.

Veer waerde zevende inne finale mer waat nag leuker woor is det "Drök drök drök" giganties väöl waerde gedreijtj in ’t limburgse en väöl “geyoutubed”.

LVK 2007

Laot mer gaon
Halve Finale

Ron en "dae van Roeffe" oet Vinlo höbbe weer twieë leuke leedjes gemaak veur ‘t LVK 2007 in Remunj en det wuuerd georganiseerd door De Katers oet Neel.

De LVK leedjes veur dit jaor waore: "’t Verkske", det eine échte LVK-mars is en "Laot mer gaon", ‘n leedje mit ‘n get aafwiekender ritme es ‘t tradisjonele, mer wo waal ‘t vastelaovesgeveul vanaaf druip.

"Laot mer gaon" haet ’t toet de halve finale gesjaf. Daonao woor ’t helaas einde oefening veur ós.

Helaas gein videobeeld of audio van dit nummer.

LVK 2006

De loupende gezèt
Finale - 8e

‘t LVK-leedje van 2006 hètj "De loupende gezèt". Es se gein gezèt höbs den hoos se mer nao de optoch te kieke. Alle dinger waat in ‘t aafgeloupe jaor gebeurt zeen waere den breid oetgemaete.Doe höbs dus eigelik gaaroet gein gezèt nuuedig. Kiek mer nao de optoch (de loupende gezèt), den wit se ‘t weer gans. Dit leedje haet Ron same mèt Wim Roeffen (Vinlo) gesjreve.

Veur de derde kieër dus La Bamba inne LVK-finale die op vriedig 10 fibbrewarie in Stein waerde gehaaje. 4.000 luuj in ‘n boemvol tennishal zorgde weer veur ‘n echte LVK-stumming.

Nao ‘nne geweldige aovendj te höbbe belaef behaolde veer oeteindelik ‘n verdeenstelikke achste plaats. Èllef plaatse hoger es de lèste kieër (2004) dus dao moge veer gerös trots op zeen.

’t Leedje haet toch waal get los gemaak bie väöl luuj, want de LVK-leedjes maakde veer bekans noeatj bie oos optraejes. Mer de loupende gezèt wuuerd door de luuj zellef aangevraog en det is den toch erreg leuk.

LVK 2005

Gein leedje in Halve Finale

Veur ‘t LVK van 2005 hawwe veer drie leedje ingesjik nl. De dörpsgek, ‘t Manderijntje en Wo zeen die hendjes?

De tekste veure leedjes van dit jaor zeen door Ron gesjreve enne meziek door Wim Roeffen, Johnny Blenco en Ron. De leedjes ‘t Manderijntje en Wo zeen die hendjes? sjreef Ron same mit Wim. En De dörpsgek sjreef Ron same mit Johnny Blenco oet Mestreech.

Helaas waerde gein vanne leedjes good genóg bevónje veur ‘n plaetske inne halve finale, terwiel de verwachtinge nao de twieë finaleplaatse van 2003 en 2004 netuurlik hoeag gespanne wore. Jaomer……

Gein beeld of geluid van dees leedjes.

LVK 2004

Laot mich veurbie
Finale - 17e

Veur ’t LVK van 2004 waerde door Ron twieë leedjes gesjreve:
Laot mich veurbie en De vastelaovendj van mien laeve.

Veer haoldje weer de finale. Mit "Laot mich veurbie" moogdje veer in oos eige Ambt Montfort op ’t Reutje (Träötje) de LVK-finale äöpene.
’t Woor gewuuen kikken óm op die buun te moge staon en veur 4.000 vastelaovesvierders inne tent en óngevieër 150.000 kiekers heim veure tillevies te mogen optraeje. Gewéldig!

Ein 17e plaats woor neet de gedroumdje plaats mer mitdoon is belangrieker es winne vónje veer.

LVK 2003

Ane kantj mit daen hanjel
Finale - 11e

In 2003 haet La Bamba veure allerieërste kieër mitgedaon aan ’t LVK. Op innesjetief van D’n Uul van de Grauwert waerde beslaoten óm mer ‘ns mit te doon.

Mer leefs drie leedjes van ‘t nuuj album "eFFe anges" waerde opgesjik nao ’t LVK wovan Ane kantj mit daen hanjel dore zjurie good genóg waerdje bevónje veure halve finale.

Door ’t volk van Limburg waerdje dit nummer zelfs inne finale gestump. De ieëste keer mitdoon en drek inne finale kómme. Waat wil se nag mieër? Winne netuurlik!
Mer det lökde “net” neet. Veer behaoldje de meis karnavallistiese plaats die ’t mer guuef: Veer waerdje èllefde. Proficiat manne!

Veer höbbe genaote van vanne spanning van te veure, ’t eindeloze wachte bie de radio wie de finaliste bekindj waerdje gemaak. De vreugde wie de ieëste klanke van Ane kantj mit daen hanjel door L1 de ether in waerdje gesjik. ’t Oppe buun moge staon veur zoväöl vastelaovesgekke. En vanne geweldige sfeer inne artiesteruumte óngerein.
Ós is de ieëste kinnismaking mit ‘t LVK hieël good bevalle, óm mer ein understeetment te gebroeke.

Vinj hie mieër video’s van La Bamba

Cookies
Voor het optimaal functioneren van deze website worden cookies op uw computer geplaatst. Daarbij worden geen persoonlijke gegevens opgeslagen. Door op ‘Akkoord’ te klikken, accepteert u het plaatsen van cookies. Als u cookies weigert, kunt u de website gewoon blijven gebruiken maar dan werken de website of onderdelen daarvan mogelijk niet optimaal.