‘nne echte vrundj

Autobiografische teks van Ron Roemen
Meziek: Johnny Blenco

Ron: Altied gedach (zoeawie de meiste luuj) det ich väöl vrunj haw mer bön dao (gelökkig ) door ‘n veurval achtergekómme, ( Harrold ouch trouwes, dae kos de teks drek trök!)
Bön noe blie mit de échte vrunj óm mich haer. Die kin se op ein handj tèlle (en den höb se ouch nag ‘n paar vingers euver) mer die zeen waal éch get waerd.

Intro

Refrein:
Jao unne echte vrundj
Is eine, dae dich alles guntj
Al geit ’t nag zoea slech
Biej hem kins se altied terech
Jao unne echte vrundj
Dae maak van erremood gein puntj
Zoea eine dae dich alles guntj
Det is unne echte vrundj

Unne echte vrundj is emes, dae ech alles van dich witj
Dae dich ouch in slechter tieje, jao den zeker neet vergitj
Stuit ut dich weer uns toet baove, ligk dich weer get oppe maag
Gank den effe biej ‘m aan, want det hölp dich door de daag

Refrein

Wilse lache, wilse bäöke, den wits doe wo’s doe det kins
Ich weit zeker zonne vrundj, dae haet zich eederein gewins
De femiliej haet dich zat bezeik sjeet die mer naor de maon
Mer echte vrundsjap geit neet euver, nae die blief bestaon

Refrein